ظهرت الفنانة نشوى مصطفى لأول مرة بعد وفاة زوجها، ودخلت الفنانة ، في نوبة بكاء على الهواء، خلال برنامج بنت البلد، عبر قناة cbc سفرة، اليوم الجمعة 10 يناير، في أول ظهور لها بعد وفاة زوجها.
وظهرت بالأسود حدادًا على زوجها
قائلة:
“الحقيقة أنا مش عارفة ابتدي الحلقة إزاي، لكن في التزامات في الحياة تجبرنا نشتغل، مكنتش عايزة أكون موجودة النهاردة علشان محبش أزعج حضراتكم بشيء شخصي، سامحوني وهحاول أتماسك قدر استطاعتي”.
وأضافت بنبرة يملؤها الحزن:
“اللهم لا اعتراض، أنا مسلمة ومسلّمة أمري لله وكلنا هنموت، لكن أنا مش عارفة أعيش، عشرة 33 سنة مشوفتش منه غير كل خير وود ورحمة واحتواء وطمأنينة وسند ودعم، وحسن تربية لأولادي وأولاده”.
وأوضحت نشوى أنها تواجه صعوبة كبيرة في متابعة حياتها بعد فقدان زوجها، لكنها ملتزمة بتعاقداتها المهنية ومسؤولياتها الشخصية، قائلة:
“أنا سألت الأفاضل أصحاب العلم في فكرة إني أنزل اشتغل لأن أنا مرتبطة بتعاقدات ومرتبطة بأشياء أخرى شخصية مينفعش أتسول أو استلف، يعني الحمد لله مستورة جدا بفضل زوجي ولكن أنا مرتبطة بمصالح ناس.”
وأشارت إلى أنها تلقت إرشادات دينية من الشيوخ حول كيفية التصرف خلال فترة العدة، موضحة:
“قيل لي من أصحاب العلم إن الخروج للعمل مش حرام والخروج للطبيب لأني مريضة قلب فلازم بشكل دوري أنزل للدكتور كل شهر أعمل إيكو وأتابع حالة القلب.
الشيوخ الأفاضل قالولي النزول للأطباء يجوز والنزول للعمل طالما أنا مش صاحبة العمل، لكن الخروج للتسوق أو للزيارات العائلية أو الترفيه دي اللي ممنوعة ولازم يحصل فيها العدة.”
نشوى مصطفى ترثى زوجها الراحل
وكانت الفنانة نشوي مصطفي نشرت عبر صفحتها علي موقع التواصل الإجتماعي الشهير “ فيسبوك ” ، صورة تجمعها بزوجها الراحل ، ونعته بكلمات مؤثرة .
وقالت نشوي مصطفي : سترتنى ربنا يسترك .. أكرمتنى ربنا يكرمك .. سيبت لى أجمل هدية ولادنا ربنا يهاديك بالفردوس الأعلى .. ٣٣ سنة ستر وكرم ومحبة ومودة ورحمة .. علمتنى إزاي أكون من المتصدقين.. علمتنى إزاي أكون دايماً فى معية الله.. علمتنى إزاي تكون عزة النفس .. علمتنى ازاي أتسامح حتى مع اللي آذانى.. علمتنى إزاي اتوكل على الله فى كل شئونى .. علمتنى إزاي أكرم ضيفى … علمتنى معنى التواضع مع عباد الله الضعفاء .
وتابعت نشوي مصطفي : يانبيل الأخلاق ياابن الأصل العالى .. نسيت تعلمنى إزاي اقدر أعيش من غير وجودك .. ٣٣ سنة مبعدناش عن بعض لحظة .. ٣٣ سنة ذكريات وحياة بحلوها ومرها.. ٣٣ سنة كنت خير زوج وخير أب .. ٣٣ سنة أكرمتنى وسترتنى وجبرت خاطرى وربيت عيالنا أحسن تربية .. ليه ياعماد سيبتنى لوحدى كده – مااستاهلش منك تسيبنى لوحدى ده انا مبعرفش أعمل حاجة فى الدنيا – انتا اللي كنت بتعمل لنا كل حاجة – انتا اللي سندتنى فى كل ظروف حياتى الصعبة — فى شدتى وفى مرضى شيلتنى وطبطبت عليا – ياااااه على غلاوتك ياعشرة عمرى — يااااااه على غلاوتك يا أبويا وأخويا وحبيبى وجوزى وابنى — باموت ياعماد — باموت وانتا مش قدام عينى — حاكمل إزاي يارب من غيره .. ادعو له بالرحمة وادعولى بالصبر وادعو لولادى بالصبر والثبات.
أعمال نشوى مصطفى
ومن ناحية أخرى تشارك نشوي مصطفي فى بطولة مسلسل “ سيد الناس ” ، والمقرر عرضه خلال شهر رمضان القادم ، ويقوم ببطولته عمرو سعد .
