وجه معتمد جمال، المدير الفني لفريق الزمالك، رسالة تقدير إلى لاعبيه وجماهير النادي، عقب مباراة الاتحاد السكندري التي انتهت بالتعادل السلبي في الجولة الأولى للدوري، مؤكدًا أن الفريق يبذل مجهودًا كبيرًا في ظل ظروف صعبة، وأن اللاعبين يستحقون الإشادة على ما قدموه خلال اللقاء.
وقال معتمد جمال خلال المؤتمر الصحفي عقب المباراة: «بشكر اللعيبة كلها على مجهودهم، وبشكر الجمهور اللي كان حاضر النهارده».
وأضاف: «أنا عمري ما اشتكيت من أي حاجة، عشان كده بشكر كل اللعيبة على المجهود اللي عملوه النهارده، إحنا شغالين عكس أي منطق».
معتمد جمال: مطلوب مننا نكسب ونجهز اللعيبة في نفس الوقت
وأوضح المدير الفني للزمالك أن الجهاز الفني يواجه تحديًا كبيرًا يتمثل في تحقيق نتائج إيجابية، بالتزامن مع محاولة تجهيز اللاعبين بدنيًا وفنيًا خلال فترة قصيرة.
وقال معتمد جمال: «إحنا مطلوب مننا نكسب ونجهز اللعيبة في نفس الوقت، والمشوار لسه طويل».
وتابع: «أنا مش قادر أضغط على اللعيبة أكتر من كده، إحنا شغالين طول اليوم علشان نعد اللعيبة».
معتمد جمال يكشف سبب تراجع اللاعبين في الشوط الثاني أمام الاتحاد
وتحدث المدير الفني عن تراجع مستوى الفريق خلال الشوط الثاني، مؤكدًا أن الأمر يعود بشكل أساسي إلى تأخر الزمالك في بدء فترة الإعداد مقارنة بباقي الأندية.
وقال: «كان نفسي أخلص الماتش بدري علشان نقدر نهدي الدنيا الشوط الثاني، لكن للأسف محصلش، واللعيبة وقعت الشوط الثاني، وده طبيعي جدًا لأننا متأخرين في الإعداد».
وأضاف: «مش عايز أفقد أي لاعب في الأول وتحصل إصابات، فإحنا بنحاول نعمل توازن ما بين المباراة وتجهيز اللعيبة».
مدرب الزمالك: أنا ملتمس العذر للعيبة
أكد معتمد جمال أنه يتفهم موقف لاعبي الزمالك والضغوط التي يواجهونها في الوقت الحالي، مشيرًا إلى أن الظروف الحالية تفرض على الجهاز الفني اللجوء إلى بعض الحلول التي كان من المفترض استخدامها في مراحل متقدمة من الموسم.
وقال: «أنا عاذر اللعيبة وملتمس ليهم العذر، وفي حاجات بتجبرنا نشوف شكل مختلف في الملعب، دي حاجات ممكن نعملها في آخر الدوري، أنا بقيت بعملها في بداية الدوري؛ لأن الوضع معكوس، والدنيا صعبة، لكن هنشتغل واحدة واحدة».
مدرب الزمالك يرفض اعتبار تصريحاته أعذارًا
ورفض معتمد جمال اعتبار حديثه عن ظروف الفريق بمثابة تقديم أعذار للاعبين، مؤكدًا أنه يحاول فقط توضيح الصورة أمام الجميع، والكشف عن الصعوبات التي يواجهها الزمالك في بداية الموسم.
وردًا على سؤال حول ما إذا كانت تصريحاته تمثل أعذارًا للاعبين؛ قال: «لا لا، ما تفهمش الكلام غلط، أنا بوضح الصورة؛ لأن عندنا مشاكل حقيقية، إحنا آخر فريق بدأ تدريبات في مصر، ده حتى دوري المحترفين بدأ قبلنا».
وأضاف: «أنا مش بدي أعذار، لكن ده واقع، كل الفرق عملت تدعيمات كمان بصفقات كتيرة، وإحنا معملناش حاجة، وبداية متأخرة. أنا مش بقول كده علشان أقول اعذرونا».
خطة خاصة في الزمالك للمرحلة المقبلة
وكشف المدير الفني للزمالك عن وجود خطة واضحة للتعامل مع الفترة المقبلة وحتى فترة التوقف؛ بهدف تحقيق التوازن بين خوض المباريات وتجهيز اللاعبين بدنيًا.
وقال: «إحنا عاملين بلان وخطة علشان اللي جاي لحد فترة التوقف، وبقول وبوضح إننا مطلوب مننا نلعب ونكسب ونجهز اللعيبة في نفس الوقت، وأنا بشارك الناس معايا».
«كنت أتمنى وجود أكثر من 8 تبديلات»
واختتم معتمد جمال تصريحاته بالتأكيد على رغبته في منح لاعبيه أكبر قدر ممكن من الراحة خلال المباريات، لتجنب تعرضهم للإصابات، مشيرًا إلى أنه كان يتمنى امتلاك خيارات أكثر لإجراء التبديلات أمام الاتحاد.
وقال: «أنا والله كان نفسي يبقى معايا النهارده أكثر من 8 تبديلات عشان مجيش على أي لاعب.. هنعمل كل حاجة في صالح الفريق الفترة الجاية».
