شن الإعلامي محمد شبانة هجومًا على البرازيلي خوان بيزيرا، لاعب الزمالك، بسبب الأزمة الحالية بين اللاعب ومجلس إدارة النادي، مؤكدًا أن ما يفعله اللاعب لا يليق بالقلعة البيضاء، ومطالبًا إدارة النادي باتخاذ موقف حاسم تجاهه.
وقال شبانة، في تصريحات عبر برنامج “نمبر وان” الذي يُذاع على قناة “CBC”:”بيزيرا صاحب المشاكل في الزمالك، واللي قافل تليفوناته ومبيردش على مجلس الإدارة، قاعد على تيك توك بكل استهتار”.
وأضاف:”جمهور الزمالك جمهور عريض، وهو اللي عمل لبيزيرا قيمة. اللاعب كان في نادٍ في أوكرانيا ومكنش حد يعرف عنه حاجة، وجماهير الزمالك كانت بتطالب بوجوده في منتخب البرازيل في كأس العالم”.
وتابع:”بيزيرا كان بيحصل على 300 ألف دولار في السنة مع الزمالك، وده معناه إنه في أوكرانيا كان بيحصل على 70 ألف دولار، لأنه لما يسيب أوروبا وييجي مصر المفروض ياخد ضعف مرتبه”.
وأوضح شبانة:”بيزيرا هو الخسران، لأنه اتنجم مع الزمالك وأصبح ليه قيمة، وشعبيته اتعملت في المنطقة العربية كلها من خلال جمهور الزمالك، لأن جمهور الزمالك عاطفي مع اللاعيبة وممكن يحب اللاعيبة أكتر من النادي”.
وأشار إلى وجود تحقيق داخل نادي الزمالك بشأن عدد من اللاعبين الذين رحلوا عن الفريق، قائلًا:”هناك تحقيق مفتوح في الزمالك عن اللاعبين اللي رحلوا وكانت مشاكلهم ممكن تتحل ومتوصلش للفيفا، ومحدش اتغرم أو دفع من جيبه غير الزمالك”.
وتطرق شبانة إلى دور وكلاء اللاعبين في الأزمة، قائلًا:”وكلاء اللاعيبة في أزمة بيزيرا بيفكروني بسمسار الشقق. أنت تبقى ماضي عقد شقة إيجار لمدة سنتين، وييجي بعد 6 شهور ويقولك: آسف، في ناس اشتكت، وأصل صاحب الشقة كان مسافر ورجع فجأة ومحتاج الشقة، وده غصب عني. فتقوله: ماشي، شوف لي حاجة تانية. وتاني يوم يشوف لك حاجة تانية، وياخد سمسرة جديدة، ويجيب واحد تاني للشقة اللي سيبتها وياخد منه سمسرة”.
واختتم محمد شبانة تصريحاته قائلًا:”ما يفعله بيزيرا لا يليق بنادي الزمالك، ولازم حسين لبيب، رئيس النادي، يتدخل. بيزيرا طالع وكأنه بيقول: اللي مش عاجبه يشرب من البحر، ولازم الإدارة يكون ليها موقف، ويتم تقديم شكوى ضد اللاعب وتغريمه، لأنه مش أي حد يلوي دراع النادي ويمشي”.
