أحيت الدكتورة هبة السويدي، رئيس مؤسسة ومستشفى أهل مصر لعلاج الحروق، ذكرى نجلها إسماعيل، بكلمات مؤثرة عبر حسابها على موقع التواصل الاجتماعي «فيسبوك».
وكتبت هبة السويدي: «زي دلوقتي حالًا، من 11 سنة، كانت آخر مرة أشوفك يا إسماعيل وأتكلم معاك فيها قبل ما تمشي وتسيبني .
وأضافت: «فاكرة اليوم ده بكل تفاصيله. جبتلك يحيى أخوك، كان مسافر مع والدكم ولسه واصل، علشان تشوفه. فاكرة كويس أوي إنك كنت قاعد على طرف السرير، وقومت قعدت تلعب معاه… وبعدها مشيت.
وتابعت: «مشيت وسيبتنا، وسيبتلي وجع قلب وحرقة، كسرت ضهري وروحي،11 سنة عدوا، ولسه الوجع زي ما هو. لا الوقت داوى الفراق، ولا الصبر هدى القلب.
وأضافت: «يا رب، غصب عني، أنا راضية وحامدة فضلك على كل شيء… بس أنا تعبت،وابني وحشني.
وأستكملت: «وحشتني ريحته، صوته، خناقاته، ضحكته، وكل حتة فيه ،ووحشني وجوده في حياتي، وحشتني كل تفصيلة كانت فيه،ومش متخيلة إن لسه قدامي سنين.. سنين يا عالم وأنا مستنية اليوم اللي أشوفك فيه تاني.
واختتمت حديثها قائلة: «وحشتني أوي يا ابني… أوي.
وأضافت في دعائها: «يارب ارحم ولدي إسماعيل، واغفر له، وارض عنه، واجعله تحت كنف حبيبك محمد صلى الله عليه وسلم، ومع أصحابه والشهداء والصالحين، وحسن أولئك رفيقًا.
وتابعت: «ربي اجعل كل عملي خالصا لوجهك الكريم، واجعل ما تقبله مني في ميزان حسنات ابني إسماعيل،رب ارحم قلب أم، وارزقني رؤية ابني وسماع صوته في المنام، رؤية تطمن قلبي وتثلجه، وتصبّرني وتربط على قلبي،اللهم اجمعني به في الجنة، لقاءً لا فراق بعده، ولا وجع ولا حرمان.
واختتمت: «رجاء وليس أمرا، ادعوا لولدي إسماعيل بالرحمة والمغفرة، وأن ينور الله قبره، ويؤنس وحشته، ويرفع درجته في الجنة،اللهم آمين».
